Вичко дорса ыслалан кырйыв юркарса посни челядя уна мам-батьлы бöръя вояснас лои радейтана местаöн. Мича кыдзъяс костын сiйö артмöма орччöн Свято-Стефановскöй кафедральнöй Соборкöд да сылöн öшиньув – челядь новлöдлана коляскаясöн гажа гуляйтанiн. Тайö аддзöмторйыс и ышöдiс менö мöвпавны-гижыштны енлы эскöм йылысь. 
Ен. Миян быдмигöн Одыб сиктса пöшти быд керкаын вöлi ен-öбраз, асыв-лyн пелесын сёян пызан весьтын. Сiйö местаыс шусьö енувпелесöн, кытчö пызан сайö пуксьöдлiсны меддона гöстьясöс. Сöветскöй кадö енлы эскöмыс – кыдзи да мый сiйö вöлi? Тайö, олöма-пöрысь войтырлöн ен-öбраз водзын быдöнлы аддзананогöн юрбитöм да сёрниын найö казьтiлiсны вежа айяс йылысь. Сьылiсны вичко сьыланкывъяс кулöмаясöс гуалöм-дзебигöн. Вичкояс кызвыннас волi жуглöма-тупкöма. Попъяс вöлiны «гуся мортъясöн». Сиктса интеллигенция гашке вöчис тайöс гусьöн, йöзысь синсайын, торйöн нин коммунистъяс. Школаын казьтылiсны попъясöс серамсорöн да кыдзи лёк «персонажъясöс», сiйö жö лыддьылiм и сэкся велöдан небöгъясысь. 
Меным вичмис быдмины уна челядя семьяын, дона бать-мамкöд да ыджыдай-ыджыд мамкöд. Бать-мам уджалiгöн бöръяясыс пыр вöлiны миянкöд-быдмысь войтыркöд. Налысь ми и тöдмалiм енлы эскöм. Велöдчим юрбитны, кывлiм да аддзылiм-тöдмасим нэмэвейся коми йöзкостса традициясöн ен праздникъс йылысь да мöдар югыдулö бöрдöмсорöн ен сьыланкывъясöн колльöдöм. Стöч висьтала, челядьдырйи да студенталiгöн ме полi-вежöгтi колананог юрбитны. Тöдса, школаын таысь чиршедлiсны, пионер-комсомолад эз примитлыны. Ас пытшкын енлы эскöмыс пыр вöлi и эм, йиджöма дзöлядырсянь. Чайта, ог сорась, мый тадзи жö вöчисны унаöн, коми да и мукöд войтыр. 
Коли кад, олöмыс ёна вежсис, мöд ногöн пансис ен дорö сибöдчöмыс. Уналаын и сиктын и каръясын енлы эскыссьяслы восьталöны ыджыдысь- ыджыд православнöй храм-вичкояс, кывны кутiс кöлöкöльнöй жыннян шыяс. Вичкоясö унаöн ветлысьяс да енлы эскысьяс ёнджыкасö мöвпалöны ен йылысь гырысь православнöй крам праздникъяс дырйи да йöввывсянь (масленница) ыджыд лунöдз (Пасха), сы кадö, кор православие пырöдчысьяслöн пост – Ыджыдвидз дырйи позьö нуръясьны яйтöм да йöвтöм сеян-юанöн. 
Челядьдырся енлы эскöмыс, кöть и гуся вöлi, министерствоын уджалiгöн на меным öдйö сетiс позянлун тöдмасьны аскöдыс архиепископ Сыктывкарскöй да Коми Зырянскöй Питиримкöд. Ме аддзылi унаысь религиознöй да мукöд мероприятиеяс вылысь и тöда сылысь аслысполослунсö прöстöй йöз дорö сибöдчöмын. Интернет везйын Епархиялöн сайтын http://www.syktyvkar.eparchia.ru эм уна гижöд православнöй храм-вичкояс лöсьöдöм йылысь. Ыдджыд пасйöд сетöма история пыр кыдзи да мый вежсис вöр-вакöд öтвыв олысь коми мортлöн олöмыс Стефан Пермскийлöн коми муö воöм бöрти, енлы эскöм пыртöм коми йöз пöвстö да енлы эскöм водзö сöвмöм йылысь. Пасйöма вичко-часовнялысь, манастыръяслысь талунъя лыдпасъяс роч Православиеса Сыктывкарскöй да Воркутинскöй епархиялысь. Ыджыд места сиöма енлы эскана быдлунъя литургиялöн оланпаслы, торйöн нин паськыд программаяс ыджыд крам праздникъяслы сиöм литургия йылысь. 
Позьö лыддьыны-тöдмасьны Сыктывкарскöй да Коми-зырянскöй епархиялöн владыка Питиримлöн (Павел Павлович Волочковлöн) биографияöн. Колананогöн вайöдöма сылысь каян тшупöдъяс том дияконсянь 1982-öд восянь пыдди пуктана архиепископöдз Сыктывкарскöй да Коми-зырянскöй епархияын тапöръяöдз. 
Медым пыдöдзджык пырöдчыны сылöн быдлунъя олöмö-вичколы служитöм йылысь, меным мойвиис Ыджыдвидз (Пост) заводитчан лунö аддзысьлыны сыкöд да сёрнитны унапöлöс юалöмъяс йылысь. Тайöн и кöсъя тöдмöдны газет лыддьысьысьясöс, тöдтöм на юöрöн вомъёртлысь – владыка Питиримлöн быдлунъя олöмысь. Со мый сiйö вочавидзис менам юалöмъяслы. 
Пыдди пуктана владыка Питирим, Тi аддзiнныд кад, медым наука бердсянь пыдiсянь тöдмавны Комиын православнöй вичкояслысь историясö. Мый лои тайö уджын шöр сюрöсын? 
Меным мойвиис велöдчины Московскöй духовнöй семинарияын, а кандидатскöй уджöн дорйыси Киевса духовнöй академияын 2005-öд воын, «докторскöй» диплом сетiсны международнöй богословскöй академияын Ужгород карын. Тайö светскöй диплом. Наукаö пырöдчöм гижöдъяссö ме лöсьöдi Коми
муын ХIХ-öд нэмся православнö